አሁን በመላው አውሮፓ፥ በአፍሪካ፥ በአሜሪካ፥ በካናዳና በአውስትራልያ ከተቋቋሙት ቀደምት አብያተ ክርስቲያናት መካከል የመጀመሪያው ቀዳማዊና ፋና ወጊው ቤተ ክርስቲያን የኮሎኝ ርእሰ አድባራት ደብረ ሰላም ቅዱስ ሚካኤል ቤተ ክርስቲያን ነው።

ቤተክርስቲያናችን ወንጌልን በመላው ዓለም ማዳረስን ተልእኮ በማድረግ ለትምህርት ወደ አውሮፓ በመጡ አገልጋዮች ብርቱ ጥረት፣ በሊቀ ካህናት ዶክተር መርዓዊ ተበጀ እና በዲያቆን በዕደ ማርያም መርሻ ፊት አውራሪነት፥ በወቅቱ የኢትዮጵያ ኦርቶዶክስ ተዋሕዶ ቤተ ክርስቲያን ፓትርያርክ በነበሩት በአቡነ ተክለ ሃይማኖት መልካም ፈቃድ እና በቅዱስ ሲኖዶስ ውሳኔ በ 1975 ዓ.ም በዚያን ጊዜ በጅቡቲና በምሥራቅ አፍሪካ ሊቀ ጳጳስ በነበሩት፥ በአሁኑ ጊዜ ደግሞ የኖርዲክ እና ግሪክ ሀገረ ስብከት ሊቀ ጳጳስ በኾኑተ በብፁዕ አቡነ ኤልያስ ተባርኮ ተከፈተ።

አመሠራረቱም እንደሚከተለው ነው። በ 1971 ዓም ለሊቀ ካህናት ዶክተር መርዓዊ ተበጀ እና ዲያቆን በዕደ ማርያም መርሻ በብፁዕ ወቅዱስ አቡነ ተክለሃይማኖት ፈቃድ ወደ ጀርመን ለከፍተኛ ትምህርት ተላኩ። ወደ ጀርመን ሀገር በገቡ በሁለት ዓመት ውስጥ ቤተ ክርስቲያን ለማቋቋም ጽንሰ ሀሳቡ በመርህ ደረጃ ለውይይት ቀረበ። በሃይደልበርግ ኗሪ ከሆኑ ወንድሞች ጋር በእመቤታችን ቅድስት ማርያም የጽዋ ማኅበር ስም መሰባሰብ ጀመሩ። ማኅበሩ የመገናኛ ድልድይ ሆኖ ሊያገለግላቸው ችሏል። በተለይም በ 1973 ዓ.ም. በምድረ ጀርመን በሃይደልበርግ ከተማ የመጀመሪያው ቅዳሴ ተቀደሰ። ለምእመናንም ቡራኬ ተሰጠ። በዚህም መንፈሳዊ አገልግሎት በለንደን ለጃማይካውያን መንፈሳዊ አገልግሎት ለመስጠት ተመድበው የነበሩት አባ አረጋዊ ወልደ ገብርኤል በኋላ የመላው አውሮፓ ሊቀ ጳጳስ የነበሩት ብፁዕ አቡነ ዮሐንስ ተገኝተዋል። ሥርዓተ ቅዳሴውንም መርተዋል። ብፁዕ አቡነ ዮሐንስ ካላቸው ፍቅርን ከተላበሰ ሰብእነታቸው የተነሣ መልካም ግንኙነት ነበራቸው። ቤተ ክርስቲያኑ ሲቋቋምም በበዓሉ ላይ ቤተ ክርስቲያናቸውን ወክለው ተገኝተዋል። የመጀመሪያው ቅዳሴ ከተካሄደ በኋላ ቤተ ክርስቲያን የማቋቋሙ ፍላጎት እየተጠናከረ መጣ። በሃይደልበርግና በሌሎች ከተማዎች የሚገኙ ኢትዮጵያውያን ተካፋዮች የሆኑባቸው የዘመን መለወጫ፥ የልደትና የትንሣኤ በዓላት ይከበሩ ጀመር።